Нефармальная сетка арганізацый грамадзянскай адукацыі (АГА) з мэтай прыцягнення ўвагі да ролі нефармальнай адукацыі ў развіцці чалавечага, грамадскага, нацыянальнага і міжкультурнага патэнцыялу краіны выступіла з ініцыятывай правядзення ІІI ТЫДНЯ НЕФАРМАЛЬНАЙ АДУКАЦЫІ І АСВЕТЫ ў перыяд з 8 па 16 снежня 2007 г.

У гэтым годзе арганізатарамі вызначана тэма Тыдня: “БЕЛАРУСЬ ЕЎРАПЕЙСКАЯ”, якая дазволіць разгледзець праблемы і паказаць перспектывы развіцця сучаснай Беларусі па еўрапейскім шляху, як арганічнай, але разам з тым самабытнай культурна-гістарычнай часткі еўрапейскай спадчыны і сучаснасці.

Зыходзячы з актуальных задач развіцця краіны і магчымых перспектыў яе супрацоўніцтва і партнёрства з краінамі Еўрапейскага Звяза, мы жадаем:

• падкрэсліць неабходнасць і карыснасць больш глыбокага асэнсавання і разумення нашымі грамадзянамі сябе і сваёй краіны як часткі сучаснай Еўропы;
• звярнуць увагу на каштоўнасць і неабходнасць нефармальнай адукацыі, як сродка самаідэнтыфікацыі і самавызначэння як на індывідуальным, так і на агульнанацыянальным і еўрапейскім ўроўнях;
• выразіць упэўненасць, што Беларусі дзеля лепшай будучыні і далейшага развіцця патрэбна больш шчыльная кааперацыя і дыалог з еўрапейскімі суседзямі;
• запрасіць да супрацоўніцтва ўсе арганізацыі і установы, якія прапануюць паслугі ў сферы нефармальнай адукацыі і асветы.

Арганізатары запланавалі правядзенне пад час Тыдня больш за 10 мерапрыемстваў для самых розных мэтавых групаў, якія пройдуць у розных гарадах Беларусі пры ўдзеле прадстаўнікоў грамадскіх і дзяржаўных адукацыйных і асветніцкіх установаў.

Запрашаем усіх цікаўных прыняць удзел ў фестывалях, сустрэчах, вечарынах, круглых сталах, акцыях у межах ІІІ Тыдня нефармальнай адукацыі і асветы, а таксама далучыцца да нас са сваімі мерапрыемствамі.