Часопіс «Адукатар» №8 (2006)

Зараз вы тут: 2006, Адукатар » Часопіс «Адукатар» №8 (2006)

Posted by admin on лiстапада 17, 2012 // Каментароў няма

Слова рэдактара

Гэты нумар часопіса своеасаблівы. Ён выходзіць напярэдадні Фестывалю нефармальнай адукацыі і цалкам яму прысвечаны. Безумоўна, “Адукатар”, які ад самага пачатку свайго існавання пазіцыянуецца як часопіс нефармальнай адукацыі, не мог застацца ў баку ад такой значнай падзеі ў дадзенай сферы. На працягу трох дзён больш за 150 тэарэтыкаў і практыкаў з Беларусі, Даніі, Германіі, Паўднёва-Афрыканскай Рэспублікі, Расіі, Украіны і Швецыі падзеляцца досведам працы і абмяркуюць найбольш актуальныя пытанні развіцця нефармальнай адукацыі.

У часопісе змешчаны матэрыялы, змест якіх будзе ў той ці іншай ступені прадстаўлены падчас працы фестывалю. Па-першае, гэта артыкулы, што тычацца тэматычных палёў круглых сталоў (“Адукацыя для ўстойлівага развіцця”, “Праблемы і перспектывы развіцця заканадаўчага забеспячэння адукацыі дарослых”). Шэраг з іх змяшчаюцца ў рубрыцы “Погляд”, бо ўтрымліваюць аўтарскія падыходы да разглядваемых праблем. І падаецца, павінны вызваць жывыя дыскусіі.
Па-другое, у “фестывальны” нумар увайшлі матэрыялы, у якіх аўтары знаёмяць са сваім досведам працы ў пэўным накірунку нефармальнай адукацыі, што, у сваю чаргу, стане асновай прэзентацый і майстар-класаў. Трэба зазначыць, што не ўсе тыя, хто будзе ладзіць на Фестывалі прэзентацыі і майстар-класы, скарысталі магчымасць прадставіць свой досведу выглядзе артыкула ў часопісе “Адукатар”. Таму, на жаль, на старонках гэтага нумара вы пазнаёміцеся толькі з некаторымі сферамі нефармальнай адукацыі і практыкай асобных арганізацый.

Па-трэцяе, у гэтым нумары мы вырашылі надрукаваць “Мемарандум неперарыўнай адукацыі Еўрапейскага Саюза”. Нягледзячы на тое, што гэтаму дакументу больш за пяць гадоў, ён па-ранейшаму не страчвае сваёй актуальнасці. У ім раскрыты сучасныя прынцыпы і падыходы да адукацыі дарослых (“адукацыі праз усё жыццё”) у Еўропе. Нам падаецца вельмі важным іх прыцягваць да абмеркавання ключавых пытанняў, звязаных з развіццём нефармальнай адукацыі ў Беларусі.

Ужо пры падрыхтоўцы гэтага нумара стала зразумела, што шэраг вельмі важных тэм Фестывалю нефармальнай адукацыі засталося па-за ўвагай. Таму вырашана, што наступны нумар часопіса стане пэўным працягам, а матэрыялы, якія ўвойдуць у яго склад, будуць утрымліваць асноўныя вынікі працы Фестывалю.

Мы вельмі спадзяемся, што Фестывль нефармальнай адукацыі апраўдае сваю назву. І атрымаюцца як сапраўднае свята нефармальнай адукацыі, так і сапраўды змястоўныя і практыка-арыентаваныя дыскусіі.

Ад імя рэдакцыі часопіса “Адукатар” і аргкамітэта Фестывалю нефармальнай адукацыі хочацца пажадаць усім удзельнікам гэтай падзеі плённай працы ў атмaсферы адкрытасці і канструктыўнасці!

Галоўны рэдактар часопіса
Дзмітрый Карпіевіч

Змест

Спасылкі вядуць да файлаў PDF з артыкуламі

Summary in English

Сеткi: